本文重點
茂業國際（00848）老闆黃茂如早傳被指捲入國美（00493）大股東黃光裕案而被調查，搞到人心惶惶，市場擔心茂業嘅業務。黃茂如為咗證明自己冇事，尋日就現身特別股東大會，仲同絲絲講話唔識黃光裕，唔知點解有呢個傳聞，又話「現身已經係最好嘅證明」，自己用「平常心」去對待呢個傳聞。
冇影響公司業務
佢話有關傳聞對公司業務及現金流並冇影響，亦唔擔心個人聲譽受損，問到佢會否追究早前作有關報道嘅內地媒體，佢話寫新聞係「有好有壞」，個人會以「平常心」看待。
絲絲記得，上月底市場傳出黃茂如被調查，因涉及與黃光裕案，茂業停牌，謠傳四起；到咗第二日茂業發通告，董事會問過黃茂如，佢要處理緊急個人事務，所以唔喺公司，又話有關黃茂如嘅報道並唔真實，佢冇受任何內地執法機構嘅調查。
雖然當時茂業已作出澄清，話黃茂如未被調查，但市場仍疑慮令股價受壓，之後黃茂如現身茂業百貨嘅活動，雖然冇邀請記者去採訪，不過公關就趁機向傳媒發放黃茂如嘅照片，證明佢仍然出席公司業務活動，股價先至止跌，果然「現身係最好嘅證明」。
余絲韻