本文重點
李寧（02331）已經係中國體育用品「一哥」，去到高位自然想衝出中國成為國際品牌，特別喺北京奧運之後，多咗外國人認識呢個牌子，而李寧首間外國專門店就設喺美國波特蘭（Portland）。絲絲聽朋友講，嗰度係美國耐克（Nike）嘅大本營，今次李寧喺人哋地頭開店，唔通想打對台直接向耐克宣戰？其實李寧首選波特蘭皆因佢哋嘅研發中心設喺附近，已聘用20至30名員工，可以同店舖互相照應。
李寧早已計劃發展海外市場，第一步已喺美國波特蘭設研究中心，今次就嘗試開店舖，試吓市場反應，可能會再喺美國開其他店舖。聽講李寧今次喺波特蘭開店比較低調，唔講唔知，原來喺本月五日已開張，主要賣最新研發嘅籃球、羽毛球及中國功夫系列產品，全部都係中國製造，暫未知銷售表現。
增加海外業務比例
銀行家朋友同絲絲講，李寧管理層話會增加海外業務比例，今年喺美國推售高端籃球鞋作為進軍國際市場嘅「試金石」，希望二○一八年海外業務收入佔總收入達20%。
余絲韻