20/01/2010

播放本新聞相關短片
查詢股票編號

絲絲講場:港交所財監詹德慈唔撈

港交所(00388)行政總裁李小加一上場,就有高層離任,集團財務總監詹德慈突宣布以其他發展為理由辭職,於三月底離任。

一家公司有要員辭職本來冇乜特別,但由於新老細李小加啱啱上場,詹德慈嘅辭職時間就好似有啲巧合。財務總監個位好重要,喺一般上市公司裏面,僅排喺行政總裁、營運總裁之後,堪稱第三把交椅。港交所董事局須要成立甄選委員會,搵人填補詹德慈嘅空缺。李小加坐低冇耐,就要急急搵人做呢個咁重要嘅職位,諗起都幾頭痕。

認股權今年全套現

外界有傳聞話,詹德慈係管理層一直有心栽培成為行政總裁繼任人嘅人選之一,但隨着港交所董事局已選出李小加,有關傳聞亦不脛而走。

過往港交所高層均獲授認股權,睇番詹德慈,佢喺○五年一月獲授共16.4萬股認股權,每股行使價19.25元,按分4年行使計算,由○七年開始行使,到今年就可全部行使,唔知今次辭職同佢可完成行使全部認股權有冇關係?按港交所昨收市價計,佢嘅認股權帳面賺2,113萬元。

周文耀退休後,外界依家最關心嘅係仲有冇高層會離任,尤其係唔少人喺今年陸續全部行使晒所有認股權。

絲絲知道,法律服務主管兼首席法律顧問高美萊嘅任期到今年七月底亦屆滿。

余絲韻