港股連跌五日後，尋日終於有反彈，本來上午大市仲係弱過藥煲，但下午突然傳上海可能成為對外投資試點，市場認為這是內地資金水浸下，中央決定「排洪」的訊號。雖然今次「排洪」目標唔係只限於港股，不過港股有咁多內地企業，自然有一定優勢，亦係最易吸引到內地股民嘅「目光」，難怪港股尋日下午突然轉晒勢，一洗之前連跌五日嘅頹勢。
市場普遍認為，大型國企股係今次嘅最大受惠者，但古晨就認為唔好睇小啲二、三線股，仲記得○八年內地北水南調，港股曾經無晒啲仙股，威力認真唔講得笑。
去年內地旱情嚴重，水價大有上調空間，形成今年啲水務股一炒再炒，中國水業（01129）進軍水業後，業務正慢慢上軌道，古晨留意到呢兩日走勢蠢蠢欲動，如果守得穩0.25元，呢轉隨時可見0.4元，止蝕位就定20日線嘅0.235元。
古晨