「直通車」已不宜憧憬

滬官開口話上海試點辦個人海外投資，缸邊友重燃本地魚缸「直通車」希望。不過古勝都係嗰句，「直通車」講咗兩三年，在人仔未能自由兌換下，料短期難以實現，估計呢個都係為魚缸反彈搵個解釋，缸邊友未宜對「直通車」存幻想。

話就話大盤回升，但亦有大隻佬逆市下跌，已成為恒指權重股之一的QQ（00700）顯著回吐，「高佬盛」指QQ現價估值過高，並將其從亞太區的入貨名單中剔除，投資評級由「買入」下調至「中性」，拖累其股價一度插水十蚊雞，低見158.6元，散場收報161.2元，跌5%。至於早兩日逆市逞強的富士康（02038），亦見回吐壓力，股價插水6%，大隻佬中跑第尾。不過，祖國移動（00941）則回復升勢，因「三網融合」將增加其增值服務、提高銷售網絡及收入，中央推出國際板平台交易，相信祖國移動可成為首批上市企業，加上現價市盈率12倍，估值合理，料股價可更上一層樓。

祖國銀監否認限制紅色錢莊信貸，加上多間大行不約而同表示，緊縮政策長遠對紅色錢莊前景有利，唱好兼給予「跑贏大市」評級，包括古勝睇好的建行（00939）和一哥工行（01398）。在下亦偏愛中行（03988），昨日升4%，係大隻佬升幅冧巴溫。

業務重組快將進行

濱海投資（08035）自收歸天津泰達後，市場一直憧憬集團將進行重組注資，但遲遲未有進一步消息，冚得咁密通常都有大動作跟尾。雖然管理層去年表示，暫未放棄經營燃氣業務，但公司易名為濱海投資，估計是為未來業務重組變身鋪路。

表叔線來料，濱海的注資重組部署正進行得如火如荼，不排除會在今年上半年拍板，看官宜密切注意映期。事實上，去年集團已獲中石油（00857）阿媽鎖定成為20年供氣夥伴，泊得大碼頭，可謂錢途無限，管理層亦曾披露，有意成為母公司地產發展之上市旗艦。濱海概念無限，唔買番多少都對自己唔住。

古勝