本文重點
二手樓市不斷升溫，唔少準買家轉戰拍賣場，不過，向來樓價有折讓嘅銀主盤，部分近期就被搶高至市價先賣出，Vincent收到風，忠誠昨拍賣售出6項物業，包括兩個銀主盤，其中天水圍嘉湖山莊樂湖居13座低層C室以150萬元賣出，較開價搶高27%，呎價2,119元，代理老友話個單位屬市價；至於另一個係北角富雅花園5座低層E室，成交價224萬元，雖較開價高18%，但仍比市價低約一成。
至於同場尖沙咀名鑄首個公開拍賣嘅單位就賣唔出，個單位係屋苑低層E室，開價2,380萬元，一度獲承價至2,430萬元，惟仍「未到價」收回。
另環亞同日就以109萬元拍賣售出粉嶺榮福中心4座高層E室居屋單位，同場最矚目嘅山頂花園單位就喺拍賣前收回。
奧海城春節推廣費升13%
農曆新年將至，信和集團商場推廣總經理蘇蔡潔蓮同Vincent講，奧運站奧海城今年春節推廣費約850萬元，比舊年升13%，估計一、二月人流達1,880萬人次，增長13%，營業額就估計會升12%至4.6億元，又會喺春節期間搞2至4組內地來港購物團，涉及200人，料人均消費5,000至8,000元。
佢又話，商場今年嘅推廣費按年增一成至4,600萬元，期內人流及營業額料1.18億人次及28.2億元，按年升11%及10%。
（Vincent Lau）