寶來證券（香港）外匯分析師 陳健豪
曾月入三千 將勤補拙

高妹：大家都話「80後」未捱過苦，你點睇呀？

陳健豪：我哋都算出生於一個幸福嘅年代，記得中學時已經可以上網玩ICQ。現時我嘅工作要睇技術分析或圖表，上網就搵得到，真係連股票價位都唔使抄，㩒吓個keyboard就得。我聽番啲前輩講，舊時啲圖表都係靠人手去抄，陰陽燭都要自己去畫。

莉莉：人人都話做金融業搵好多錢，你都一定搵唔少啦？

陳健豪：錯喇，我剛入行時都捱過一個月得3,000蚊人工，仲少過啲菲傭。嗰時係新仔一名，經驗又少，搵客自然艱難，當年好多同期新人捱唔住，最後都轉晒行，但我就有唔衰得嘅心態，希望做出一啲成績。

循序漸進 虛心求教

高妹：原來你都有捱過苦嘅！

陳健豪：係呀，記得每逢公司有講座舉行，我都會早啲返公司整理宣傳單張，然後就落街派，由朝早10點派到傍晚6點，嗰時我嘅自尊心都有啲受損。

莉莉：金融業人才濟濟，你有冇諗過要點樣先上到位呀？

陳健豪：我覺得事業上應該要循序漸進，太快未必係好事。做金融業，經驗真係用年月浸出嚟，我自己冇經歷過乜嘢大風浪，所以都會向前輩請教，例如問番以前發生股災嘅情況，總之我用更多時間將勤補拙，肯學肯做，相信總會遇上伯樂。

法興證券衍生工具部策略師 蔡秀虹
心中一團火 永不言棄

高妹：「80後」喺投行工作，究竟有乜嘢機會和困難呢？

蔡秀虹：我覺得機會背後一定有困難，但克服困難後，機會亦會出現。好似三年前我得到上司提拔，由市場推廣轉去賣窩輪，之後仲嘗試寫文章，過程中對窩輪、牛熊證更有認識，後來去接聽熱線電話，有時接到客戶嘅粗言「問候」，都會有啲沮喪，但年輕人應該保持心中嘅一團火，遇到困難亦唔好輕易放棄。

莉莉：你個樣咁「妹妹仔」，工作時會唔會畀人質疑你嘅工作能力？

蔡秀虹：為免人哋質疑自己，就更加要做足準備工夫，令人哋肯定我嘅工作能力。當然有唔少前輩喺呢行都好有經驗，佢哋嘅說話一定有道理，但作為年輕人亦應該對自己有信心。其實與上一代相比，「80後」都有優勢，例如思想比較開放、容易接受新事物、有較多元化嘅想法，好似窩輪咁，種類都愈出愈多啦。

唔捱得苦講法太負面

高妹：好多前輩都話現代年輕人唔捱得苦，工作態度同以前嗰代冇得比喎！

蔡秀虹：面對上一代嘅前輩以及「90後」嘅後輩，我覺得「80後」係比上不足，比下有餘。依家我每朝早8點返到公司，要寫文章，又要聽客戶電話，有時候更要出外見客，星期六又要做投資講座，但忙碌之中又會有生活充實嘅感覺。

莉莉：現時社會對「80後」評價有好有壞，你又有乜感受？

蔡秀虹：我都喺溫室長大，因為父母都好錫我，但大學時期我都有去幫人補習同教琴，目的都係想減輕家庭負擔。如果要與上一代比較「捱苦」，我哋一定比唔上，但社會亦唔應該對「80後」年輕人有太負面講法，好似我與一啲同輩，大家都好努力工作，都想事業上有所進步。

華富嘉洛證券投資分析師 季霆剛
凡事靠自己 適應轉變

莉莉：你除咗喺外國讀過書，仲遊歷過70個國家，好令人羨慕呀！

季霆剛：一個人喺外國讀書真係好孤零零，寒冬時候更加慘，生活並唔係大家想像中咁多采多姿。嗰時屋企負責畀學費，自己就上網搞啲生意，由大陸入貨，再轉手賣畀外國人賺生活費。我向來做事都靠自己，唔會靠別人。

高妹：你成日都見唔同層面嘅人，你又知唔知「80後」對工作或事業有乜睇法？

季霆剛：少工時、多工資，能夠喺兩至三年內轉工兼升職，出人頭地，係好多「80後」嘅目標。以前啲人打工會出120%嘅力量，但依家嘅人做到100%已經足夠，總之做足自己工夫就算，唔好搞咁多嘢啦。

莉莉：不過依家香港人嘅工時愈嚟愈長，但人工就加得好少喎！

季霆剛：隨着時代變遷，我覺得老闆們要適應吓現代人對時間觀念嘅轉變，工時唔應該太長，冇人想每晚12點先收工，打份工唔係簽賣身契呀！城市人成日瞓得唔好，所以足夠休息係好重要。

唔扮勤力 冇料咪充

高妹：但太準時收工會令人留下壞印象，扮吓勤力都要啩？

季霆剛：通常老闆會比較早收工，既然佢都走咗，你又何必留喺公司加班而惺惺作態呢？講真，要我早返工冇問題，但遲收工就唔好喇。至於星期六、日嘅時間，我一定會留畀自己，如果真係要見客，就唯有改變吓心態，寓工作於娛樂。

莉莉：打工仔一定想升職，但上層人一日唔走，下層人就一日都唔使旨意上到位！

季霆剛：現時社會進步，資訊太過氾濫，老一輩應該要適應時代嘅轉變，好多事情都冇可能再沿用舊制，有新人去頂替老一輩係正常事，呢個係交唔交棒嘅問題。但「80後」做事時亦唔應該太過自我中心，發表意見時應建基於理論之上，千祈唔好「冇料扮有料」。

35％股友 會抽南戈壁

由於散戶冇得公開認購俄鋁（00486），南戈壁能源（01878）變相成為今年IPO頭炮，喺上周五開始招股，係近年罕見以超過128元定價嘅新股，唔知股友們會唔會認購呢？

根據今期《東方產經》民調顯示，截至上周末晚上6時，話會認購嘅有35%，話唔會嘅就有65%。

莉莉、高妹

若有料報畀高妹同莉莉或有嘢問，可電郵money.biz@opg.com.hk