至於本地魚缸今日都係瓜多過菜，在花旗魚缸掛牌的ADR全線仆直，按比例推算，今日恒指至少插水270點，即21,400點水平或不保，估計好友將退守二萬一關，但古勝又唔係太悲觀，點睇本地魚缸呢段時間都仲係上落市。加上今晚花旗魚缸假期，唔排除好友午後作出反擊。雖然多項技術指標均顯示，本地魚缸漸趨疲弱，但在下對後市仍然睇好，上周口痕友話成交平均800億元樓上，沽壓唔多輕，古勝卻視之為有人沽貨套現，同時有人趁低吸納，魚缸承接力不弱，既然呢個位都有人肯接貨，相信調整亦唔會插水太深。

個別板塊仍有追捧，上周國務院出台加速落實推進電訊網、廣播電視網、互聯網「三網融合」，對電訊設備供應商最為利好，由於預期會投入6,000億人仔資金，所有供應商都可受惠。祖國移動（00941）猛追落後，股價逼近80元行人止步，但料稍作整固後，可再向上挑戰82元。

紅色錢莊逢低可吸

至於紅色錢莊上周表現較弱，不過從資料顯示，祖國商業錢莊的不良貸款保持「雙降」，無論不良貸款額及比率均見下跌，在去年紅色錢莊大開水喉下，不良貸款反而下跌，反映貸款質素持續改善。古勝堅持紅色錢莊可逢低吸納，首選建行（00939）及中行（03988）。

上周消費股跑贏大市，尤其波鞋股捧場客不絕，除咗波鞋股，古勝亦睇好鞋業龍頭百麗（01880）。百麗今年減少宣傳折扣優惠，加上完成整合收購業務，提升營運效率，預期毛利率可拉闊。

銷售網絡持續擴展

另一方面，集團去年積極擴大零售網絡，去年第四季新增166家鞋類零售店，○九年新增店舖共700家，估計今明兩年百麗的銷售網絡料再擴張，有助提升銷售額。即使中國經濟去年上半年處於低潮，但百麗期內盈利仍能按年增長18%。日前百麗股價受主席以每股9.2元減持套現23.3億元消息影響，曾回落至9元水平，但論及公司前景及規模，百麗不失為投資者投資於祖國消費市場的低風險選擇。

古勝