本文重點
希慎（00014）主席利定昌去年離世，佢生前擔任多間公司嘅非執董，國泰航空（00293）亦係其中一間，國泰尋日就宣布委任利定昌嘅堂親利蘊蓮為獨立非常務董事，由昨日起生效。
利定昌堂親 身兼多職
自從利定昌離世後，希慎喺日前宣布由鍾逸傑做獨立非執行主席，而利家後人利子厚亦會返希慎幫手，總算敲定咗管理層；而利定昌喺國泰嘅非執董職位，亦由利家成員利蘊蓮接任。
今年56歲嘅利蘊蓮係利孝和二女，現時係澳洲上市公司Keybridge Capital Ltd.主席，同時亦係另外3間上市公司嘅非常務董事，仲身兼澳洲政府購併委員會、澳洲摩根大通諮詢委員會及悉尼科技大學商學院常務理事會成員添，真係百足咁多爪。
今次國泰搵利蘊蓮做獨立非常務董事，每年會畀番50萬董事酬金，佢仲會加入審核委員會及薪酬委員會，各有酬金15萬及5萬元。
余絲韻