本文重點
摩根資產管理聯同港大、中大及科大3間大學搞嘅「模擬基金經理大賽」尋日舉行頒獎禮，有450人參加基金經理個人挑戰賽，團隊挑戰賽就有40組參加，JF資產管理太平洋區投資組別常務董事李鴻斌都有出席，與同學仔享做基金經理嘅心得。
基金經理靠自我學習
李鴻斌話基金經理好難可以教出嚟，所有人都係處於一個不斷自我學習嘅階段。佢英文名叫做Victor Lee，佢就用咗自己個名「V.Lee」概括做基金經理要留意嘅嘢，「V」係股票嘅估值，「L」代表資產流動性，兩個「E」就代表盈利及市場期望。
比賽結果方面，中大嘅「運籌帷幄」隊贏得團隊挑戰賽；個人挑戰賽就由港大嘅汪禮彬奪得冠軍，佢哋都可以得到一筆獎金，喺摩根資產管理開新嘅投資戶口。比賽時間由去年十月至十二月，摩根資產管理亦有喺唔同校園舉辦不同課程。
余絲韻