幫港交所做「生招牌」

話說港交所（00388）與貿發局等將於三月八日，喺加拿大多倫多舉行礦務公司來港上市研討會，除咗港交所主席夏佳理、財經事務及庫務局局長陳家強會出席研討會外，最特別應該係邀請到南戈壁總裁馬藹隆現身說法，解釋點解要到香港上市，以及講吓喺香港及加拿大兩地上市嘅好處。

依家南戈壁未上市，暫未知其股價表現，但國際配售已錄得超額認購，如上市後交投活躍兼股價不俗，有咗呢個「生招牌」幫手推廣，吸引其他加拿大礦務公司來港上市就容易得多啦。

絲絲記得，港交所喺○八年中已去過加拿大做路演，推廣當地礦務公司來港上市，除咗南戈壁即將在港登陸外，喺加拿大上市嘅克能石油亦有意喺今年來港作第二上市。至於澳洲、南非及中東等公司喺中國大陸嘅礦務項目，聽聞亦對來港上市有一定興趣。

余絲韻