搞網失意 畀牧師點醒

講到「堅持不懈，永不放棄」，馬雲話好多年前搞網搞到好失意，走咗去美國散心，有朋友邀請佢去教堂，有位牧師講道時引用咗邱吉爾一句說話「Never never give up」，令佢深受感動，呢句話嘅神奇力量令佢堅持唔放棄繼續做網絡生意，先可以成就到今日嘅阿里巴巴（01688）。

佢又話依家中國民企就好似一種行為藝術及中國精神咁，今年世博仲有個民企館添，隨着未來民企發展，佢堅信20年後中國會有國企紀念館，好讓國企好好紀念吓自己喎。

數據靚唔代表經濟復甦

馬雲並深信金融海嘯仲未過去，而且仲創造緊另一個危機咁話，皆因中國面臨真正嘅危機，需要調整經濟結構及擴大內需，但呢兩樣嘢都仲未做到，經濟復甦只係因為政府掟咗4萬億出嚟嘅必然反應，造就咗樓股齊升，經濟數據靚一靚嘅局面，但佢唔覺得咁樣代表經濟復甦，就好似一個人體溫Keep喺37度，唔代表佢冇病一樣喎。

余絲韻