內地前日突然調高存款準備金率，震散股市，內銀股首當其衝，沽盤真係由中環排到去西灣河咁遠，工行（01398）同埋建行（00939）不停出現千人斬場面，都幾壯觀吓，還好係市場秩序良好，股仔唔見任何斬倉現象，相信陣痛過後，大市仍有炒上機會。
樂觀啲睇，今次跌市可能係另一次入貨良機，內需股仍係市場上嘅焦點，內地透過抽緊銀根去打擊過度投資，因而令內需佔今年經濟增長嘅比重將提高，展望今年應有更多催谷內需嘅政策。
利郎（01234）上市經過一個月收集後，貨源早已歸邊，踏入今年愈炒愈勁，近日隨大市回吐，不過連日跌至10日線都有唔錯支持，即使尋日市況咁曳，都見跌唔落，就知隻股街貨有幾乾，如果市況好番，相信一定炒到癲，向上暫睇7元，止蝕位可以考慮20日線嘅5.25元。
古晨