本文重點
近幾個月公屋樓價都跟隨大市攀升，市場更頻頻出現百萬公屋成交，本月至今已有三宗百萬公屋登記，其中兩宗更加係短炒成交，好似大埔太和邨新和樓高層10號室喺四個月內三度易手，個單位舊年九月先由投資者以110萬元買入，但施政報告後市況波動，投資者以103萬元將單位賣出，帳面蝕7萬元，至於承接嘅買家今個月以115萬元登記賣出單位，持貨兩個月帳面賺12萬元。
至於黃大仙竹園北邨桐園樓中低層19室，本月以120萬元登記賣出，單位舊年十月成交價只係88萬元，反映樓市有升無跌。
入標荔枝角道計緊數
屬於一鐵一局今年招標項目頭炮的荔枝角道項目，將會在下個禮拜一截標。Vincent八到，獲邀入標的15家發展商都仲計緊數，其中會德豐地產（香港）常務董事黃光耀及嘉華國際（00173）副總經理（發展）尹紫薇都話仲計緊數，所以目前未落實會唔會入標，睇嚟都會在最後一刻先決定到，始終市場變化難以預計，不過，該兩集團都異口同聲話，如果周一落實入標，都會以獨資方式參與。
（Vincent Lau）