本文重點
渣打香港行政總裁洪丕正（阿Ben）上月與屋企人去咗北海道過白色聖誕，絲絲友人亦係同佢哋同一班機。隨着阿Ben嘅曝光度增加，人氣指數跟住上升，自然愈嚟愈多人認得佢，所以出街都要打醒十二分精神，絕不能有乜嘢行差踏錯。
細路坐飛機勁乖
友人向絲絲報料，話想讚佢對小朋友嘅家庭教育做得好好，點解？話說友人當日喺飛機上睇見有兩個十幾歲嘅細路，好乖咁坐喺經濟客位上靜靜睇書，唔似一般細路咁貪玩，或者只顧着打機，真係好難得。友人心諗點解有咁乖嘅細路，都有啲衝動想走去問吓佢哋，正喺呢個時候，忽然有一對夫婦唔知喺商務艙定喺頭等艙走近兩個乖小孩，應該就係細路嘅父母，嗰位男士高頭大馬有啲面善，友人赫然發現原來正係洪丕正。阿Ben平時工作咁忙碌，而佢對小孩咁有教養，絲絲相信佢嘅太座都功勞不少。
余絲韻