李寧大談空中情緣

至於港人好熟悉嘅體操王子李寧，佢嘅愛情故事發生喺印度嘅上空，話說喺八二年，李寧與陳永姘雙雙奪得印度舉行嘅亞運會男、女子體操全能冠軍，歸途上兩人坐喺機艙嘅最後排，李寧膽粗粗問對方有冇男朋友，陳永姘諗都唔諗就答「有」，李寧心有不甘，追問人在哪裏？答案係「遠在天邊，近在眼前」，之後嘅發展大家都知啦。

至於已為人父嘅盛大話事人陳天橋，就話未諗到送乜嘢畀老婆做情人節禮物，但就話一定會送，而且仲會送埋畀個女添；佢又話覺得自己最大遺憾係與太太結婚時，太太冇着婚紗又冇擺酒。不過絲絲覺得唔緊要，因為據講陳天橋依家周六、日基本上乜都唔做，只係陪太太同個女，相信陳太都唔介意當年冇婚紗着啦。

余絲韻