本文重點
港交所（00388）候任行政總裁李小加本月十六日正式上任，雖然周文耀尋日話一啲都唔擔心港交所嘅未來，相信喺李小加嘅領導下，港交所可以繼續成功，但李小加就不無壓力，面對周文耀呢塊「珠玉」在前，頻呼要「更上一層樓」，Mission impossible喎！
「喝水不忘挖井人」
李小加話喺周總領導下，港交所無論喺盈利、股價及財務表現上已達世界級水準，成功已係史無前例，佢實在好難再重複周總嘅成就，因此要做得好過周總，佢形容係Mission impossible。佢仲特別引用咗一句古語「喝水不忘挖井人」，寄語眾人要記住周總作為前人對港交所所作嘅努力，睇嚟佢個人都好飲水思源喎！
李小加都幾有幽默感，尋日佢讚揚周總時，不忘話如果第日佢自己退休時，能保持好似周總依家退休時個樣咁後生同靚仔就好嘞；佢又話希望記者們日後可放佢一馬，唔好令佢日子難過喎。絲絲尋日得悉，港交所總部嘅國金一期原來有條秘密通道可以走人，希望李小加日後唔使用上呢條秘密通道啦！
周總盼港交所見300蚊
李小加將於三月公布港交所最新嘅策略計劃，佢最關心係中國市場發展及全球競爭對交易所嘅影響。
五大經紀協會尋日歡送周文耀，周文耀以傳媒問及嘅四大問題作結，包括自評20年來表現、成就感、退休感受及退休後打算。佢話退休後嘅3個月冇乜打算，打後3個月嘅生活費就要睇李小加表現，可唔可以谷到港交所股價升到300蚊。佢仲笑住話唔會學詹培忠從政，笑言「拍枱冇佢咁大力，做唔到佢做嘅嘢」。
余絲韻