本文重點
近排大市表現都幾陰陽怪氣，好彩資金炒股唔炒市，啲股仔依然生猛非常。近排唔少股份都炒得幾狠，好多落後股一日升三、五成亦比比皆是，真係有禾雀亂飛嘅感覺，落後股嘅威力真係唔可以睇小。
主打富豪內需概念
耀萊（00970）去年收購咗賓利、蘭博基尼及勞斯萊斯嘅汽車分銷權，另外又搞埋Richard Mille鐘錶分銷代理權，又有Pewitt鐘錶分銷權，連同Parmigiani及Boucheron珠寶等等，而且仲簽咗全球頂級釀酒商Puclot及Petrus（柏翠）的中國代理權，實行全天候式去服侍內地班富豪，中期業績已經成功轉虧為盈，獲利3,650萬元。
耀萊本身直頭係富豪內需股概念，最難得係股價仲未大炒過，真係風險都細啲，一旦開車，隨時炒到你唔信，咁落後，睇1蚊絕對唔過分，止蝕定番0.58元。
古晨