至於本地魚缸，在祖國魚缸昨日早段腳軟下低開，雖然下半場祖國魚缸勁升，可惜恒指最終仍跌84點，收報22,326點；國企指數則跌151點，收報12,967點。期貨場大走低水，收報22,241點。值得留意係未平倉合約增至超過八萬張，古勝相信好淡角力好快會有結果。

本地「火雞股」受捧

大隻佬個別發展，紅色錢莊表現較弱，皆因缸邊友擔心在三月人大舉行時，中央會實行緊縮政策，紅色錢莊股沽壓重重，大部分在下降軌中運行。不過，人行在昨日傍晚時分宣布調高存款準備金率，相信紅色錢莊短期劣勢已反映呢個壞消息，家陣落實公布反而係好事。至於紅色地主亦持續受打壓政策所影響，表現麻麻。石油股亦有所回吐，其他資源股如是，只有紅色電話筒表現較佳。

隔晚花旗「火雞股」走軟，但昨日本地魚缸的「火雞股」卻受捧，聯想（00992）有大行唱好，逆市升4.9%，唯冠（00334）更勁升五成，中國軟件（00354）升兩成。看官可吼中芯（00981），日前急升後再整固，公仔圖表似行複式旗形。波鞋股亦有捧場客，361度（01361）同特步（01368）分別升逾13%及8%。

寒冷天氣持續，天文台又發出寒冷天氣警告，燃氣股預期呢個冬季售氣量大增，今年業績大豐收，相關業務股亦不容忽視。古勝則睇好登陸魚缸無耐的勝利管道（01080）。上周股價重返水面後，經幾日整固，昨日走勢又見突破。勝利管道主要客戶為中石油集團及中石化集團，兩大客戶幾乎已佔去公司全部營業額。去年勝利管道的SSAW焊管產能雖然只有32萬噸，但今年已大幅增至54萬噸，另集團已開始建設兩條產能共10萬噸的生產線，料今年可竣工。

積極擴展應付需求

由於發展天然氣是祖國大趨勢，中央在這方面的投資有增無減，尤其國家西氣東輸及中俄輸油大計開展後，對油管設備需求甚殷，從而帶動管道需求上升，勝利管道積極擴展產能，不僅能配合市場需求的同時，亦有助擴大市場佔有率。

勝利管道撞正上月中魚缸插水時登陸，甫上市一直潛水，故未受缸邊友留意，其潛力更一直受忽視。以招股價2.2元計算，至今年十二月底止，勝利管道盈利預測市盈率不過14倍，一點不貴。加上其晒士最啱芬佬胃口，呢個位上車，至少睇3元，屆時市盈率也不過22倍左右，相對唔少燃氣股，依然平咗一大截。

古勝