本文重點
新盤入伙一向是投資者炒賣嘅好時機，濠江壹號湖畔去年底入伙交樓，隨即帶動樓價急升。中原（澳門）營業董事何兆恒同Vincent講，近排屋苑錄得多宗短炒成交，好似有投資者買入屋苑四座低層Ａ室，持貨僅一星期即以逾一千四百六十五萬元沽出，帳面速賺九十六萬元，以面積二千三百二十六方呎計，呎價約六千三百元；而同屋苑一座中層Ｄ室最近以四百萬元賣出，原業主只係揸咗個單位一日半帳面就賺廿萬元。
大廈樓梯位搶高82％售
何董預期，壹號湖畔今個月樓價有百分之六升幅，估計春節後呎價或會去到七千至八千元，而年底更有機會衝破一萬元大關。
講開投資房地產市場，物業拍賣場係近期唔少投資者嘅尋寶熱點，Vincent昨日去參觀環亞物業拍賣會，推出十五個物業，競投氣氛最激烈係由發展商持有約二十九年嘅油麻地砵蘭街昌威大廈地下樓梯位及旁邊空地，開拍前有九個登記人士，最終有六個人舉手競投，輪流出價合共達二十口，最終以高底價逾八成二的一百四十六萬元賣出，以樓面約一百四十方呎計，呎價超過一萬元。
（Vincent Lau）