市況繼續淡靜，半新股較為活躍，話晒新上市，無蟹貨區又無阻力，上升空間自然較大。幸而詩詩亦唔執輸，睇中首長國際（00697）快突破，尋日早段以1.91元買入20萬股，收報1.98元，詩詩決定持有。
較早前曾有台灣傳媒報道，指統一企業（00220）母公司計劃在明年購併滙源果汁（01886），雖然雙方齊齊「耍太極」，但有關傳聞近日又再傳出。對於之前有媒體「放風」，統一發言人就有關事件回應，因過往一直專注於亞洲區消費食品市場，與區內同業間的策略性結盟亦屬自然事情。當時滙源亦曾發出通告，澄清不知悉報道的消息來源。緋聞主角齊齊支吾以對，詩詩認為空穴來風必有因。
其實去年當可口可樂宣布收購滙源時，統一曾考慮將手持的滙源股權售予可口可樂。最終交易卻告吹，及至內地今年法例放寬後，也令統一考慮增加在滙源的投資，甚至不排除直接購併。要賭呢類購併消息，唔係開大就開細，詩詩會密切留意事情發展，睇吓有無機會搭順風車。
詩詩