本文重點
今年最後兩隻新股喺尋日掛牌，專門售賣木製梳子嘅譚木匠（00837）主席譚傳華做木匠出身，公司當然送自己最出名嘅產品木製梳畀港交所作為紀念品，呢把「巨型梳」唔簡單，除咗有成呎咁長之外，仲雕上唔少活潑生動嘅松鼠及葡萄圖案，更改埋個名叫「碩果纍纍」，真係別出心裁。
星亮原來都識生肖
譚傳華喺上市儀式度話：「我們要做全球第一。」即係成為全球木製梳理品及小木製品嘅第一品牌，而佢最大嘅心願係要令譚木匠品牌成為百年品牌。佢同絲絲講，話公司有自己一套企業文化，就係建立「誠實、勞動及快樂」嘅價值觀，而且佢希望將中國傳統工藝品文化宣揚出去，所以公司產品係集當代設計及傳統工藝特色於一身。
至於同樣喺尋日上市嘅星亮（00955），佢哋係首間來港上市嘅德國公司，咪以為外國人唔識中國傳統，佢哋就送咗一個玻璃老虎擺設畀港交所，除咗寓意「虎虎生威」之外，仲配合埋明年係虎年，睇嚟外國人對中國嘅十二生肖都好有研究。
余絲韻