本文重點
繼去年底後，中資銀行高層近日又嚟一次大執位，唔單止同一時間涉及五大行嘅高層，而且職級都係副行長以上，都咪話唔矚目。工行（01398）尋日宣布聘任羅熹做副行長，而交行（03328）亦證實，該行執行董事、副董事長及行長李軍正式辭任，其職務將由現任工行副行長牛錫明填補。
李軍離交行 牛錫明接棒
現年49歲嘅羅熹，原本係農行執行董事兼副行長；而53歲嘅牛錫明，原先係工行執行董事兼副行長。除咗佢哋兩人職位有變之外，據聞羅熹喺農行副行長之職，將由國家開發銀行副行長蔡華相頂上，至於啱啱辭任交行行長嘅李軍就會過檔中行（03988）做監事長。
其實內銀高層換班並不鮮見，絲絲記得對上一輪喺去年九月，當時嘅交行董事長蔣超良獲中央委任做國開行黨委副書記，辭去交行一哥嘅工作，由中投前監事長胡懷邦接棒，蔣超良之後仲做埋國開行副董事長及行長。
換言之喺短短一年多，交行就經歷咗兩次高層換班，唔知交行員工會唔會覺得高層好似走馬燈咁轉嚟轉去，一時間唔認得邊個打邊個呢？不過可以肯定嘅係，李軍同埋蔣超良呢兩位交行前高層，個人職途都更上一層樓。
余絲韻