本地魚缸在花旗魚缸帶挈下，昨日指數高開64點，報21,544點，更一度重上21,600點水平；國企指數亦在祖國魚缸做好下帶動高開50點，報12,720點。今日期貨場結算，但現貨場昨日交投淡靜，成交額進一步縮水至344億元。在缺乏資金進場下，本地魚缸中段已無力再上，更一度倒跌，午後祖國魚缸攀上接近全日高位散場，本地魚缸回穩，恒指收報21,499點，國企指數則報12,644點，變化唔大。

大笨象走勢漸穩

雖然有缸邊友指本地魚缸要繼續尋底，但古勝卻認為好友成功守住二萬一水平後，唔排除結算後反擊，不過較明朗的市況，或要待一月中才出現，皆因唔少大戶仍放緊假未埋位，要待資金重新入場，本地魚缸才有機會突破。

至於大隻佬則乏善可陳，大笨象（00005）走勢反覆，缸湖傳聞蘇皇有意將祖國、咖喱國、馬國的零售及商業銀行業務售予大笨象，涉資30億英鎊。大笨象走勢漸穩，暫守88元水平。

另一重量級祖國移動（00941），孖屐對副董事長涉嫌個人嚴重違紀一事唔見有大反應，不過，古勝講過，祖國開發3G後，祖國移動已失絕對壟斷地位，數據顯示祖國移動上客量放緩，加上市場預期明年3G競爭更趨激烈，祖國移動短期難有運行。

和黃趁市靜發力

周一賣地成績中規中矩，成為「白石王國」大地主的信置（00083）昨再升0.5%，算係未有買貴地。長和孖寶（00001&00013）近日頻頻獲主席超人增持，和黃終擺脫較早前弱勢，昨日逆市重越10日線，最高見51.25元，收盤報51.1元，續彈2.9%，成為大隻佬升幅冧巴溫。

紅色金融股繼續腳軟，不過跌勢尚算溫和，平保（02318）跌逾1%，跑尾二。保險AH股統一會計準則，勢將令保險H股的盈利受壓，對股價不利。新會計準則將不再容許H股攤銷保單成本，而須將之計入當期損益。紅色地主個別發展，缸邊友仍擔心祖國出現資產泡沫，合景（01813）跌近4%至5.63元，華潤置地（01109）跌2.5%至16.7元；龍頭中國海外（00688）持平於16.42元。半新丁花樣年（01777）則顯著升近一成，皆因獲「高佬盛」唱好。

講開半新丁，近日特別受資金追捧，譚木匠（00837）及星亮（00955）昨日趕及本年度登場的最後一班車，股價雙雙做好，分別較招股價升52.3%及1.8%。古勝則睇好剛完成整固，又再突破的半新丁中糧包裝（00906）。

貨源盡入強者手

中糧包裝為祖國最大的金屬包裝企業，阿媽中糧集團每年有逾30億元人民幣的包裝需求，有阿媽呢個大碼頭泊住，集團未來業務會有穩定增長。中糧包裝上市集資所得資金，將用作拓展與擴充二片飲料罐及塑膠包裝產能，相信生產線相繼投產後，集團於內地金屬包裝市場的佔有率將進一步增長。

雖然中糧包裝現價較招股價累積升幅唔嘢少，但集團未來有機會逐步將包裝相關業務注入，同時亦會進行購併，務求令中糧包裝成為祖國消費品包裝公司一哥。中糧包裝經過一輪整固後，在9元附近有較強支持，加上貨源盡在芬佬手，在極度歸邊的情況下，值得持中長線。

古勝