話咁快過咗幾日聖誕假期，不過節日氣氛仍然濃厚，現貨成交得番378億元。詩詩都提唔起勁，倒不如諗諗後日除夕派對點扮靚好過。雖然尋日成交縮晒水，但個別股份仍見大戶積極收集，好似首長國際（00697）昨日在幾間大行買盤支持下，高收1.9元，睇走勢短期可望衝破2元上試2.3元。
內地幾個大行業，呢兩年加快整合，工信部日前表示，明年將配合有關部門進一步規範鐵礦石進口秩序，進一步提高鋼鐵業的入門檻，汰弱留強。首國有首鋼咁大個碼頭做後援，相信會係呢場淘汰賽的贏家。
講到本業首國當然有優勢，睇番今年首國單係持有福山能源（00639）股份，經已贏到開巷。首國今年曾三度增持福山股份共12.14億股，成本共43.19億元，按福山7.74元收市價計，所持股價市價已接近94億元。單係呢項投資，帳面賺咗50億元，點計條數，首國現價都被低估。詩詩長期睇好首國，2元樓下仍超值，考慮買些少過元旦，作為明年投資一個好開始。
詩詩