本文重點
內地傳媒早前話登封市政府瞞住少林寺，與中旅合作發展嘅旅遊項目，除咗以少林寺為主題外，未來仲計劃分拆上市，搞出一場賤賣國家資產嘅小風波。不過隨着國家旅遊局與國資委官員出席該項目嘅成立儀式，事件發展峰迴路轉。絲絲尋日與香港中旅（00308）董事總經理許慕韓傾開，佢話保證隨着更多旅遊項目被引入，少林寺嘅收入一定有增無減。
保證唔影響少林收入
許總話，其實佢哋都好明白少林寺嘅心情，所以保證咗日後中旅喺景區度有乜嘢發展都好，絕對影響唔到少林寺現有嘅收入。
不過，好似話個項目嘅成立儀式原本有少林方丈釋永信個位及名牌，但方丈最終都無出現。雖然絲絲唔係局內人，唔清楚詳情，但佛家之人其實都唔使太執着。
許總話，中旅係國資委旗下大型骨幹企業，又係香港四大中資企業之一，係中國最大嘅旅遊企業集團，既然係央企，唔明點解啲人話佢哋賤賣國有資產？況且少林寺係國家文物保護之一，根本無可能上市，希望大家唔好再有誤解喇！
余絲韻