本文重點
聖誕節假期後返嚟，氣溫突然急降至十幾度，絲絲都不知幾想「捐」喺「被竇」唔郁，不過，向來勤力嘅合和基建（00737）董事總經理胡文新尋日就冒着寒風，出席內地珠江三角洲西岸幹道第三期（西線三期）嘅動工儀式，由於呢個項目係合和基建及廣東省公路建設公司各佔50%，所以有好多廣東省及中山市嘅官員嚟撐場。
胡文新對西線三期呢個項目都好緊張，因為總投資額要成56億元人民幣，佢估計工程需3至4年完成，而西線三期全長38公里，北端與西線二期喺中山連接，並向南伸延連接珠海高速公路網。
廣珠車程唔使一粒鐘
胡文新同絲絲講，待西線三期落成，與西線一期及二期全線貫通之後，由廣州去珠海真係話咁快就到，行車時間由目前超過2小時縮短到少於1小時，等埋港珠澳大橋喺二○一五年底建成，珠三角嘅道路網將進一步完善。
余絲韻