臨近年尾，本港經濟前景確實見到曙光，由金融業、零售餐飲業以至旅遊服務業均開始復甦，不過，對於來年的本港經濟前景預測，不如由大眾市民來親自評論，相信代表性可能較政府官員，甚至各界老闆更為準確。以下是街頭的市民直擊訪問，且看他們對經濟及工作前景有何看法。
Polly 保險從業員 前景變樂觀
「相比金融海嘯發生時，依家市場氣氛的確好咗。我從事保險業，呢排同啲客傾嗰陣，都覺得佢哋普遍對前景變得較樂觀。我諗香港經濟恢復仲需要啲時間，如果要重返金融海嘯之前嘅情況，可能要等到明年底！」
Alexis 大學生 預咗搵得少
「香港嘅經濟仍未完全復甦，我諗仲未見底添！金融海嘯嘅影響應該會持續，最快都待明年中後先會明朗啦！我依家讀緊教育學士學位課程，畢業後有機會成為教師，但係經濟困難以及依家多數新入職教師只能獲合約聘用，所以我估畢業後嘅薪金會較現水平為少。」
廖小姐 專上學院學生 搵工仲好難
「雖然失業率跌咗，但我見好多師兄師姐搵工，只有搵銀行業工作較前易咗，其他行業都仲係好難！我自己讀設計，將來都係做呢行㗎喇！經濟其實真係好咗，因為我行街時都發現多咗人，尤其係內地人囉！我冇做兼職，都係用爸爸媽媽畀嘅零用錢，所以即使經濟好咗都唔係好關我事，自己嘅消費同平時差唔多，都係Shopping多啲！」
陳先生 任職髮型屋 唔敢諗跳槽
「經濟的確係好咗啲，多咗啲客人嚟剪頭髮！公司生意多咗，都有加人工，不過加得唔多，加人工後，自己買嘢嘅支出都增加咗。（會唔會趁經濟好考慮跳槽？）冇諗呀！現階段唔會囉！」