本文重點
早幾日有傳蘇格蘭皇家銀行（RBS）董事局仲聲大夾惡，聲言不滿政府收緊花紅監管，可能醞釀集體跳槽潮；不過最新消息又話，RBS終於戒甩「洗腳唔抹腳」呢鋪癮，學識減省不必要嘅娛樂開支，今年聖誕聯歡派對每位員工僅獲10英鎊資助。
每名夥計僅10英鎊
據當地資深搞手透露，銀行界為免再次惹起國民公憤，大部分公司喺今個聖誕佳節決定一改傳統，對員工唔再豪氣，僅以「小」型派對作為耍樂。
RBS今時唔同往日，話晒寄人籬下，自然要識睇人眉頭眼額，不過10英鎊兌番港元只得125蚊，當地消費水平又高過香港，真係食包薯片、飲多兩罐啤酒，咁就隨時玩完返得屋企。
絲絲睇番其他有披露使費嘅銀行，連好克己嘅滙控（00005）都最少有20英鎊，同樣被政府打救嘅萊斯銀行（Lloyds Banking）更有35英鎊，絲絲擔心RBS咁搞法，真係會激起員工集體辭職，聖誕聯歡派對分分鐘變成員工歡送晚會。
余絲韻