力谷中草藥護膚品

霸王首席執行官萬玉華尋日喺內地介紹「本草堂」產品，佢話喺7年前就開始籌備呢個產品，會與「中藥世家」一脈相承，發揚傳統中草藥養顏文化，而呢個系列主要客戶群係25至45歲嘅白領，記得公司上市時曾經講過，話日後會再推出更多個人護理產品，包括護膚品及牙膏。

絲絲聽證券行朋友話，霸王推出護膚品系列，首次涉護膚領域，價格與Olay相若，對公司有利，因為可以降低單一產品風險。絲絲記得霸王產品代言人係成龍，廣告中嘅一句「動L」深入民心，佢哋為咗提升品牌形象，上市前又搵咗王菲做代言人，結果上市公開認購超額400倍，凍結資金744億元，而公司亦不負眾望，首日上市股價升27.3%，散戶帳面賺1,300元，睇嚟明星效應果然好有效。

余絲韻