本文重點
每年嘅聖誕節，唔少股友都會留意「股壇長毛」David Webb一年一度嘅「聖誕推介」，尋日Webb嘅網站又登咗「聖誕推介」，絲絲記得佢喺九九年開始每年都有「聖誕推介」，今年剛踏入第十一年（過去十次推介有八次賺錢），所以絲絲都特別睇吓Webb今年有乜推介。
唔想偏離網站主旨
點知搵勻成篇文章，都搵唔到推介股份，之後再細心睇，先睇到Webb話佢個網站從來都唔會推介股份，每年嘅「聖誕推介」只係想當禮物送畀讀者，但係佢覺得咁樣做，好似已經偏離咗網站原本想提升香港上市公司嘅企業與經濟管治之主要目的，所以「聖誕推介」經過十年時間，都係時候嚟個終結。
不過佢話雖然以後唔再寫「聖誕推介」，但仍會寫文章提醒讀者，有乜嘢上市公司需要注意。除咗有問題嘅上市公司外，質素好嘅公司佢一樣會繼續發掘，至於大家點知Webb發掘咗乜嘢公司？佢就叫大家留意聯交所嘅權益披露資料喇。
余絲韻