本文重點
○九年係全球金融動盪之年，滙豐銀行執行董事王冬勝適逢今年出任香港銀行公會主席，要拆解嘅問題之多可想而知。佢尋日主持今年最後一次銀公會議時亦坦言，做咗4屆銀公主席，今屆係最忙嘅一年，但佢話喺任內並無遺憾喎。
工作小組開會140次
回顧今年嘅點滴，王冬勝話覺得銀公嘅工作一直在變，亦一直喺度尋找定位，相信銀公嘅角色會愈嚟愈重要。佢認為隨着本港新嘅監管條例出台，銀公與監管機構溝通要更進取，否則政策唔可行，只會增加銀行成本；而本港作為人民幣國際化嘅試點，過程中亦要就人民幣業務運作嘅細節安排向人行反映，協調得好嘅話就對本港有利。
王冬勝又話今年經濟欠佳，對銀行界係富挑戰性嘅一年，年內銀公轄下嘅工作小組開會達140次，完成70份建議書，工作量好大。至於貢獻方面，王冬勝謙稱留待外界去評價，不過佢話喺任內已盡心盡力為業界爭取應有利益，並無遺憾。
咁佢最難忘嘅片段係乜？佢話最難忘嘅唔係今年任內發生嘅事，而係九八年佢做銀公代主席嗰陣，當時政府決定入市「打大鱷」，喺銀公例會上，記者對香港經濟前景感到好徬徨，見慣世面嘅佢，第一次見到在場記者神色好慌張，此情此景印象難忘。
余絲韻