本文重點
好多打工仔都知道，昔日嘅老闆可能會係你今日嘅敵人，不過過咗檔去英國保誠嘅行政總裁容佳明一於少理，與舊老闆美國友邦保險主席（香港及澳門）林文德一樣都係咁老友咁好傾，正所謂識英雄重英雄，呢啲咪就係好例子囉！
尋晚喺亞洲保險嘅五十周年晚會度，絲絲見到容佳明與林文德一直都好多嘢傾，搭晒膊頭咁咬耳仔。絲絲估計，林文德當然會關心佢呢位舊下屬喺英國保誠做得慣唔慣，而容佳明亦好可能請教番舊老闆，美國友邦喺香港上市，啲股份買唔買得過呢？
預告保誠推勁產品
容佳明一直係保險界嘅Fit人，以前帶領美國友邦一直有聲有色，仲係保險市場一哥；佢加盟嘅新公司英國保誠就一路發力，據保監最新公布嘅數字，佢哋新造壽險生意市佔率仲排第二，係做得最好嘅保險公司。容佳明同絲絲講，話估計全年佢哋都會係做得最好嘅保險公司，佢仲話公司明年會有啲好勁嘅壽險產品推出，大家真係要密切留意喇！
余絲韻