本文重點
預定喺明日公布業績嘅現代美容（00919）可謂消息多多，繼早前換核數師、發盈警、多名獨立董事請辭，要創辦人兼前主席曾裕向外重申公司財務全無問題等事件後，執行董事兼營運總監袁少萍尋日突被罷免職務，雙方更先後鬧上勞資審裁處及平機會！
袁少萍向平機會申訴
按公司公布，董事會喺上周四議決向袁少萍發出通知，罷免其執董職務，自今日起生效，原因係袁少萍未能履行執董嘅職責，且其業務目標與集團不一致，而董事會認為咁會對該公司嘅業務經營造成負面影響；通告仲話公司注意到與袁少萍之間曾有爭議，而公司與袁少萍已喺勞資審裁處向對方申索，公司喺上月獲平機會告知，袁少萍已喺十月向平機會對公司作出申訴。董事會重申今次罷免將不會對業務經營產生任何不利影響，公司會喺適當時候就事件作進一步公布。
袁少萍喺16年前投身美容界，外界一直公認佢係曾裕嘅得力助手，今次事件喺美容界以至投資市場，相信都會引來談論！
余絲韻