魏應州接受《彭博》訪問時透露咗呢個退休大計，佢希望做多4年，即喺60歲時就退休，家陣已經為接班部署緊，佢有3位公子，大仔魏宏名及三仔魏宏丞都喺康師傅做緊主管。

開疆闢土為乖仔鋪路

其中大仔魏宏名接班嘅呼聲甚高，魏應州對呢位32歲長子嘅接班培養係自小開始。魏宏名讀高中時，一到暑假就會喺公司或者啲世叔伯嘅企業度實習，中學一畢業就去咗英國讀書，讀完碩士後，由於康師傅有好多日本合作夥伴，所以佢仲去埋日本早稻田大學進修日文添！呢位公子亦都甚為定性，○六年已經與青梅竹馬嘅陳鈺雯結婚，正所謂「修身、齊家、治國、平天下」，魏宏名做足修身同埋齊家呢兩樣嘢。

不過喺交棒畀乖仔前，魏應州就會親自開疆闢土，佢考慮喺大陸購併飲品及烘焙食品公司，仲諗住透過家族持有嘅頂新集團，收購及經營台北與上海嘅辦公室及房地產項目，佢認為「全世界都沒有比這裏更亮的地方」，至於其他市場，佢就會留畀啲仔去做。

康師傅發行TDR成績好好，魏應州話啲錢會用嚟擴張，因為商場如戰場，唔係你死就係我亡，所以一定要喺市場上維持絕對領先，拋離第二位愈遠愈好。

余絲韻