隔晚道指再創今年收市高位，但對港股無咩刺激作用，恒指收復50日線唔夠一日又失守，市場話資金續有流走，大戶手法高深莫測，是升是跌真係難估到爆，不過炒股唔炒市，依家市弱但都有好多股份炒到飛起，大把嘢好玩，無謂理個市點走。
港股靠祖國撐腰，國策風往那裏吹，資金自然跟風到位炒，所以睇實北大人頭，自然搵到風眼。早前國資委點名話玻璃業出現產能過剩，結果搞到信義玻璃（00868）插晒水，不過有消息指經過一輪淘汰後，十月份玻璃企業開始轉虧為盈，而信義玻璃本身受惠於汽車玻璃嘅需求急增，今年業績唔差，現時整個行業成功走出谷底，炒反底下，本身早有業績支持嘅信義自然最值博。最重要係公司老細多次喺市場吸貨，更係信心保證，暫時以9元作目標，止蝕位可以考慮放於6.2元。
古晨