冧市日賺百四萬奠勝

其實絲絲講緊嘅係「大福證券恒指期貨模擬投資比賽」中，冠軍人馬岑連娣嘅致勝之道。岑小姐全憑喺比賽最後一日賺到一百四十萬元模擬資金，最終以一個月內取得二點七九倍嘅回報率「稱后」，仲拎埋「單日期指王大獎」殊榮。佢好謙虛咁話自己炒期指唔叻，今次勝出全靠囝囝喺背後做軍師。

亞軍陳源達及季軍繆天慧就分別於期內錄得二點五倍及二點二七倍嘅回報，兩人異口同聲話，參賽前並無炒期指嘅實戰經驗，今次算係小試牛刀，雖然炒期指風險較炒正股大，但勝出比賽後都有興趣繼續鑽研炒期指嘅技巧。

今次比賽由港交所（00388）贊助獎品，成功吸引近二千名中、港地區人士參與，每名參賽者會獲一百萬元模擬資金作本金。尋日負責頒獎嘅大福證券副行政總裁李耀榮就教路話，炒期指要特別留意即日波幅，尤其喺牛皮市況要識得睇勢平倉。

余絲韻