傳密謀回港發展

當日星展中國成立之時，星展搵咗林太由香港飛去大陸擔大旗，主管內地業務發展，事隔不足3年，咁快就無得做CEO，真係有啲奇怪，若然話係林太已屆退休年齡，故有此決定，咁之前就唔搵佢做中國嘅CEO啦。絲絲細想佢都唔係第一個有咁嘅命運，好似恒生中國以前嘅CEO符致京都唔係做得長，唔通喺內地做CEO真係好難嘅？

跟住落嚟，大家梗關心邊個人接替林太啦，絲絲收到風係○五年七月加入星展，現為私募股權部主管嘅張在榮，佢呢幾年都身在香港工作。講番林太，有小道消息話佢卸任嘅真正原因，係同新加坡總部發展中國業務嘅理念夾唔嚟，林太都係好實幹型嘅女強人，若然投閒置散其實有啲浪費人才，所以有消息話佢正密謀回港，到底係真係假，就有待時間證明。

余絲韻