唔貪心獲英軍大生意

絲絲尋日睇最新一期《工商月刊》，已經87歲嘅夏利萊道出咗做人做生意嘅宗旨。佢話佢哋從小就喺老父身上學會忠實及誠信，幾兄弟早年曾經幫英軍購置雜貨及新鮮物品，由於英軍當時缺乏資金，於是開放九龍嘅貨倉叫夏氏兄弟自己提取物品作補償，結果佢哋只攞咗兩箱威士忌及20條香煙（其他人起碼攞十幾廿箱），但亦因為佢哋嘅老實，結果英軍仲委任佢哋做軍方嘅主要供應商，負責供應洗衣服務、食品雜貨及制服。

攻印度自己友都唔掂

正如佢爸爸所言，「即管賺取你想得到的利潤，但切忌貪心或欺詐，貪婪會損害家族的名聲」。至今夏利里拉集團已建立一個全球酒店王國，仲經營貿易公司、醫療物流及餐飲業。

夏利萊作為印度裔人，一直想拓展老家印度呢個大市場，但做生意係唔可以感情用事㗎！佢哋與好多商家都希望進軍印度市場，因為當地係全球最大及發展得最快嘅新興經濟體之一，但佢哋同其他人一樣，一直克服唔到當地嘅貪污制度，打入去時都吃盡苦頭，蝕本離場，只能嘆一句「連自己友都搞唔掂」。

余絲韻