廖董同Vincent講，今次出任內地統帥一職，係早年為公司成功開拓澳門市場嘅王俊琳。王總話，上海只係集團拓展內地市場嘅首站，現時喺市內中心城區，好似盧灣、黃浦及徐匯區等已開咗五間分行，未來就計劃進駐其他重點城市，包括北京、廣州、深圳及重慶等，積極擴大內地版圖。

美聯工商舖搞跑數比賽

聖誕節將至，唔少代理老友忙於搞慶祝活動，Vincent收到風，美聯工商舖（00459）今年加插多一個名為「極速銷售大獎」嘅活動，旨在激勵前線同事喺長假期前夕，不忘多做幾單生意。該行行政總裁黃子華話，前線同事只要喺今個月二十日或之前促成租售成交佣金達10萬元，就可參加抽獎，頭獎幸運兒可獨得1萬元現金，另4名同事亦可獲1,000至5,000元現金獎。另凡喺期內佣金達10萬元的同事，都可獲得一份總值近1,000元的餐飲美食禮物包，作為一點心意同鼓勵。

（Vincent Lau）