港澳賽區嘅冠軍成功將本金五萬美元滾大到超過六十五萬美元，足足有十三倍，更比內地冠軍嘅本利和多出約一倍。呢位香港冠軍得主係就讀香港大學專業進修學院金融服務嘅鄭伯恩，佢喺○七年開始投資股票，但炒現貨金銀就從未試過，佢話比賽令佢學識點樣去判斷新聞嘅準確性，又話會將一萬蚊獎金用嚟投資。

季軍孤注一擲買跌

港澳區亞軍及季軍亦將本金滾大到逾四十萬美元，獲季軍嘅歐陽傑同學就分享話，喺比賽截止前一日，佢戶口曾有七十萬美元，但因當日金價突然大跌，而佢又用咗高槓桿，所以當時戶口一度只剩五萬美元，結果最後佢孤注一擲，將僅餘嘅五萬美元用嚟買跌，結果成功將資金滾大到四十六萬美元，對毫無投資經驗嘅佢嚟講，都算係一個奇迹！

余絲韻