零售股鍾意搵明星做代言人，繼利郎（01234）請吳彥祖做代言人後，內地零售休閒服及布料生產商洪良國際（00946）亦搵咗寶島偶像藝人何潤東做代言人，尋日佢仲同寶島名模林嘉綺喺投資者推介會上穿上洪良自家品牌衣着「行Catwalk」。
兩人嘅出現自然成為全場焦點，吸引在場不少投資者。絲絲聽朋友講，洪良自創品牌服裝「MXN」，公司話「M」係代表現代（Modern）、「N」代表自然（Nature）、「X」代表新一代年輕消費者重視嘅元素──時尚及自然。
為提升品牌，公司搵咗何潤東做代言人，朋友又話何潤東嘅衣着及生活有品味，佢嘅形象與公司目標客戶（18至35歲消費者）好配合，所以搵佢做代言人。絲絲都相信明星效應好重要，好似霸王（01338）上市時，成龍做代言人，上市當日股價表現唔錯，希望洪良上市當日股價都表現理想啦！
余絲韻