鼓勵中資善用港人

李小加話中資證券業協會嘅成立，令到佢呢位「生於大陸，長於大陸」嘅香港人零舍自豪及高興，佢話咁係象徵咗中國嘅實力以及香港嘅開放。佢希望中資企業日後可以好似港交所咁開放，敢起用大陸人做重要角色，中資公司當然亦要善用港人，至於證券業嘅寶號就要「有上有落」，中資大舉南下，港資券商亦可以北上。

李小加咁感觸，可能係回想起咁多年嘅奮鬥，先可做到依家呢個地位。絲絲仲諗住佢演講完再搵佢慢慢傾吓「中國富強」呢個話題，點知佢一講完就即時閃人，絲絲問佢做乜咁匆忙，連紀念品都未攞就走，佢話要趕夜機去台灣搞啲兩地發行ETF及窩輪嘅嘢喎。

尋日除咗中資證券業協會搞酒會之外，計劃嚟香港上市嘅農行亦正式成立咗農銀國際，仲低調咁搞咗一啲成立儀式。內地銀行積極喺香港成立投行業務，自從中銀國際成立後，個個都跟住用「×銀國際」呢個模式改名。

余絲韻