講過再嚟 兌現承諾

呢個提早慶祝嘅聖誕派對，原來係上月花旗全球義工日嘅延續。話說花旗集團環球金融交易服務亞太區主管Anthony Nappi與私人銀行亞太區行政總裁Aamir Rahim上個月去完幼兒園探訪後，應承咗班小朋友會再嚟過，大人講過嘅嘢又點可以唔算數呢？所以佢兩個就再次探訪，仲搵埋香港區資本市場及企業銀行業務總裁麥永森添。

小朋友當然期待佢哋再返嚟，但估唔到Anthony咁鬼馬，扮成聖誕老人出現，搞到成班小朋友即刻尖叫，個個撲埋去聖誕老人，要抱抱又要攞禮物！

見到班細路仔咁活潑可愛，Anthony非常感觸，原來佢諗番起自己3個仔女細個時係幾咁期待聖誕節，見到聖誕老人幾咁興奮。佢今日扮成聖誕老人派禮物時，呢啲珍貴回憶就一幕一幕咁重現眼前，認真感動！

余絲韻