昨日跌市，紅色地主普遍下跌，皆因「阿爺」動真格，採取措施打擊樓市炒風。國務院常務會議原則通過《關於試行社會保險基金預算的意見》，推出八項措施，包括將個人住房轉讓營業稅徵免時限由兩年恢復到五年，其他住房消費政策繼續實施，即現行營業稅優惠政策年底到期，明年取消。

紅色地主暫避風頭

市場解讀相關措施將增加炒作住房成本，壓抑投機活動。大型內房股昨跌幅尚算溫和，中小型內房股跌幅較大，沿海家園（01124）收報0.71元，跌8.9%，近日熱炒嘅越秀投資（00123）亦乘機抖氣，收報2.45元，跌6.49%，短線都係暫避風頭為妙。

另方面，雖然汽車以舊換新嘅單車補貼金額標準將提高到5,000元至1.8萬元人仔，但小排量車購稅優惠縮水至7.5%，此舉令汽車業界頗感意外，預期新措施將減緩未來數月嘅汽車銷量增速，故見升足三個月嘅紅色砵砵車，昨日變成被「車」對象，主力銷售小排量汽車嘅吉汽（00175）急跌8.24%，東汽（00489）跌6%，駿威（00203）及華晨（01114）分別跌8.1%及4.5%。不過，由於節能與新能源汽車示範推廣點城市會由13個擴大至20個，當局並將選擇五個城市進行對私人購買節能與新能源汽車給予補貼試點嘅政策，故已開展環保汽車業務嘅比亞迪（01211）僅跌1.5%。

事實上，今年內地汽車銷售將達到1,200萬至1,300萬輛，數目唔細。要知道，汽車呢樣消費品，唔會用一頭半個月就換。喺經濟企穩過後，用公帑補貼汽車銷售嘅做法需要調整，喺繼續實施有限度補貼汽車銷售之餘，優惠政策將向節能環保汽車市場傾斜。可想而知，今年汽車股百花齊放過後，明年將呈個別發展，因應政策取向，如何選購汽車股，大家心裏有數。

新丁龍源（00916）首日掛牌，散場報收8.93元，較招股價升9.4%。嚟緊另一隻熱爆嘅新股係太保（02601），但由於已發A股，即係已經有個現成參考價，所以對其H股表現唔好期望過高。

產品銷路已有保障

時值內地煤炭消費旺季，煤炭股較具支持。福山能源（00639）專注做鐵礦石及焦煤業務，打住主要股東首長國際（00697）及首鋼系嘅牌頭，已獲大股東採購冶煉精煤，佔總產量75%，不愁銷路；公司亦已跟包括唐鋼及武鋼等大型鋼鐵廠簽訂長期合作協議，產品銷路有保障。

在鋼鐵及煤炭業仍處於產業改革之際，福山兩大主營業務卻有大樹護蔭，今年上半年賺逾7億元，足以叫人投下信心一票，加上本月初公司順利入股澳洲第四大純鐵礦勘探及開採公司Mount Gibson，成功開展境外業務，前途一片光明，難怪近日再獲大行花旗唱好，股價可再睇高一線。

古勝