蘇蔡潔蓮又話，今個月宣傳費中，有60萬元用喺本月十二至二十日舉辦嘅鋼琴慈善表演籌款，目標籌約20萬元去幫助舊年四川大地震嘅災民。展望未來兩個星期六、日，合共四日嘅人流料123萬人次，按年升13%，營業額亦料有12%增長。現時商場出租率98%，呎租介乎40至300元。

蘇太又話，為咗幫奧海城商場「升呢」，出年會積極優化商戶組合，會引入名牌商戶，至於有咩新品牌，佢話要賣個關子喎。

代理採物業資料新表格

正所謂牽一髮動全身，差餉物業估價署早前推出咗「物業資訊網」之後，就停止透過電話為市民提供物業資訊服務，為咗配合新安排，《2009年地產代理常規（一般責任及香港住宅物業）條例》亦需進行修訂，並且喺本月七日正式實施。

Vincent收到風，地產代理監管局昨日特別向業界發出執業指引，提醒代理朋友上述條例已修改，並需使用新版嘅「物業資料表格」及「出租資料表格」，而新版表格主要係刪除咗原有表格內的物業樓齡同面積資訊服務。

Vincent Lau