本文重點
撞着全球經濟不景氣，好多公司都要勒緊褲頭過日子，但係做服務行業，有啲嘢就點都唔慳得。好似新加坡航空雖然連CEO都因為業績下滑要大幅減薪20%，但係每年8億美元（約62.4億元）嘅頭等機艙專用香檳使費就一個仙都無減過！
航空業向來與經濟掛鈎，受去年金融海嘯影響，全球唔少大型航空公司到依家仲捱緊世界，絲絲尋日就睇到星航Cut Budget嘅新聞，話原來星航錄得7年以來首次連續兩季蝕錢，搞到連星航首席執行長Chew Choon Seng都要減薪兩成。
寧削薪唔減香檳使費
雖然減咗薪，但做CEO嘅都要度橋搞番好份業績，Chew先生就話商務客對佢哋好重要，唔單止佔營業額超過四成，而且利潤率仲高過一般乘客好多，所以一定要保持頭等艙乘客嘅服務質素，因此頭等艙用嘅一定要係靚酒靚香檳，咁又點可以減呢方面嘅使費呢？
說話就係咁講，生意亦都係咁做，不過絲絲亦要嘆一句「窮人難做」，皆因好似星航咁，生意唔好嘅時候就話對頭等艙乘客嘅服務一定要保持質素，生意好時對頭等艙乘客服務仲愈來愈好，咁你話一班坐經濟艙嘅乘客難唔難做呢？
余絲韻