本文重點
體育運動衍生嘅商業活動係世界上最龐大嘅市場之一，足球更加係其中表表者，唔少品牌都希望透過贊助球隊催谷銷售。好似奧迪汽車咁，佢哋唔單止與德甲勁旅拜仁喺○二年起就有合作關係，依家仲計劃入股拜仁百分之九點○九。
助拜仁攻亞洲市場
雖然近年拜仁成績大不如前，喺歐洲賽亦無乜貨交，不過佢哋一向持家有道，經營呢盤足球生意非常穩陣，以富豪球會嚟講，佢哋好少以天價買球星，球會主席路明尼加都話，希望今次合作可幫到拜仁打入亞洲市場。奧迪就一向都係拜仁嘅汽車合作夥伴，佢哋會分三個階段，由明年三月起到二○一一年七月逐步入股拜仁。
唔少汽車公司都有贊助球會，但直接入股球會就好少見。奧迪與拜仁某程度上都幾似，奧迪一向走高檔路線，但就以低調見稱，係內地豪華房車嘅一哥，勁過寶馬，政府亦都採購好多奧迪嘅車，與拜仁以前實而不華嘅低調路線有啲相似。
余絲韻