本文重點
絲絲愛食魚生壽司，又鍾意追求新款手袋，但從來冇諗過兩樣嘢可以撈得埋，講緊嘅唔係壽司形狀手袋，或者用手袋裝壽司，而係一盤Crossover生意。成日都會搞搞新意思嘅板長壽司老闆鄭威濤（Ricky）尋日就同絲絲講，話原來佢啱啱同米蘭站老闆姚君達夾份喺灣仔買咗幾層舖，搞日本最流行嘅飲食及購物Crossover。
合資2.45億購駿逸峰3層
佢哋兩個先前夾份以2.45億元，向爪哇控股（00251）買咗灣仔駿逸峰地下、1樓及2樓零售樓面，打算喺嗰度開設提供壽司料理及名牌百貨旗艦店。Ricky笑笑咁話，今次係佢咁大個仔最大額嘅物業投資，估計總投資約3.4億元，由於香港暫時未有同類型店舖，所以對新店生意充滿信心。
Ricky一向都好有生意頭腦，佢話香港人生活繁忙，排完隊食完嘢後已無時間再去其他地方Shopping，有見及此，佢睇準駿逸峰周圍人流多，加上附近上班一族消費力強，故決定喺上址打造飲食購物新試點。據悉呢3層總樓面逾1.7萬方呎，依家暫由車行以每月約100萬元租用。香港嘅壽司店多個米舖，競爭好劇烈，Ricky爆咗佢嘅新動作，睇嚟壽司行業將有一輪廝殺啦！
余絲韻