杜拜世界事件的衝擊慢慢淡化，美股率先回穩反彈。美股好，港股自信心都返晒來，上個禮拜好多股份嚇一嚇，乘勢震倉，今個禮拜全部魂魄歸位，尋日升勢相當全面，唔少更追回上個禮拜嘅跌幅。咁又係，上個禮拜咁嘅市況都入市接貨，自然係大戶啦，大戶買完貨，又點會仲有平貨畀一眾散戶上車呢？
杜拜賴債單嘢，好多股份都無辜辜被牽連在內，好似隻中國建築（03311）咁，本身並無承接杜拜世界嘅建築項目，但上個禮拜就無喇喇畀人狂質，搞到個價唔見咗兩成。其實集團近期中標頻頻，應該今年業績唔會太差，大屠殺後貨源流入強者手，在炒業績下，反而可看高一線，尋日見股價一口氣收復番所有平均線，走勢良好，今次再升穿3.8元就唔講得笑，隨時會見4.3元，上周五被狂質，3.1元都守得住，可以做止蝕位。
古晨